Inhaltspezifische Aktionen

Pronostication Doctor Joseph Grünpecks (1532)

Text
Pronostication Doctor Joseph Grünpecks / Vom zwey vnd dreyssigsten Jar an bis auff das viertzigst Jar / des aller durchleuchtigsten großmechtigsten Keiser Carols des Fünfften etc. vnd begreyfft in jr vil zu:okünfftiger Hystorien. (...) Nürnberg o.J. [1532].
Texterfassung
-- Zeilengetreue Erfassung, aber Silbentrennung aufgehoben;
-- übergeschriebene Zeichen sind nach dem Muster "u:o" kodiert (für u mit übergeschriebenem o; die übergeschriebenen Zeichen sind nicht immer gut identifizierbar, bitte ggf. an einem Original überprüfen;
-- aufgelöste Abbreviaturen in Schweifklammern.
Textgrundlage
-- URL: http://mek.oszk.hu/03400/03447 bzw.
-- URN: http://nbn.urn.hu/N2L?urn:nbn:hu-5423
Digitale Fassung
-- Bearbeiter: Thomas Gloning (mail)
-- Version: 21-06-2007.
Copyright
-- You may use this file for non-profit purposes only. Do not remove this header from the file.  

<<A1a>>

Pronostication Doctor Joseph
Grünpecks / Vom zwey vnd dreyssigsten Jar an
bis auff das viertzigst Jar / des aller durchleuchtigsten
großmechtigsten Keiser
Carols des Fünfften etc. vnd
begreyfft in jr vil zu:okünfftiger
Hystorien.

Plus.       Vltra.

[Reichsadler]

<<A1b>>

N

Ach dem vnnd jch auß
wunderbarlicher genad Go:etlicher verordnung /
vnd nach gewonheit der alten weysen / in der meynung
eyner gotseligen warnung / vil bu:echer het
lassen außgehen / zu:o allen stenden Christlicher
Oberkeyt / verhoffet jch also / das auß sollicher heylsamer vermanung /
folgen solte / ein bessere vnderricht vnd ordnung aller gu:oten
sitten / vnd gesatzen / Aber es fallen ta:eglich so schwere hendel
fu:er / so mancherley geferligkeyt / vnd allerley vnglu:eck / das man
nicht kan noch mag ein rechtschaffne weiß / einer gu:oten ordnung
vnd Reformation / erfinden. Derhalben so fellt eintweder mein /
vnd anderer schreyben / dahyn in verachtung / oder werden gar
in ein vergessenheyt gestelt. Aber nichts dest minder so wirt vns
armseligen sterblichen menschen keyn rhu:o zu:ogelassen / am firmament /
vnd an sternen / von wegen allerley vnglu:eck / vnd schweren
leuffen menschlichs geschlechts / All stund drewet vns das
vnglu:eck (welchem wir nicht entgehen mu:egen) vnd wu:ettet wider
vns auffs aller grewlichst / das es sich ansehen lasset / als sey
keyn zeyt / von anfang der welt her / nie schwerer vnd grewlicher
eintretten / Dann es erscheynen ta:eglich am himel newe wunderzeychen /
mirackel / vnd seltzame gesicht / welche alle / vnser schwacheyt
vnd gebrechligkeyt schwerlich antasten / vnru:ewig / betru:ebt
machen / vnd schenden / das nicht wunder wer / das die verzweyfelung
das gantz menschlich geschlecht mit eynem solchen eynigen
angriff / zu:o boden stu:ertzet. Darumb hab jch wo:ellen thu:on wie
eynem trewen Christen gebu:ert / vnd meyn vorigs schreyben vnd
vermanen / widerumb herfu:er ziehen wo:ellen / vnd etliche grawsame
wunderzeychen beschreyben / damit die forchtsamen kleynmu:etigen
ein gewise sicherheyt jres Raths / haben mo:echten / vnd in
jren engsten vnd no:eten ein zu:oflucht haben.

Nach dem vnd die alten Hystorien / den newen / die hand bieten /
vnd vber ein stymmen / so habe jch auch etlich gewise Hystorien
hie anziehen wo:ellen / seytenmal alle schwere grosse vnglu:eck
welche sich in vergangner zeyt / vber menschlich blo:edigkeyt vnd
<<A2a>>
vergenckligkeyt zu:o tragen haben / Vns auch schrecken zu:o vnser
zeyt / derhalben sie auch vmb solcher vrsach willen wider herfu:er
kumen / vnd geschehen / eintweder von wegen Go:etlichs Rachs /
natu:erlicher vrsachen / oder sonderlicher straff halben vnserer
grossen su:end vnd lasteren.

Zu:o der zeyt / da Got schwerlich erzu:ernet ward / vber das volck
zu:o Babylon / vnd wolt seinen grimmigen zorn vber sie außschu:etten /
da ist das groß wasser in Jndia / Ganges genant / vber all
außbru:ech der felsen so gewaltigklich außgangen / vnd vberloffen /
in das feld vnd ebne der Babylonier / das das gantz land mit
wasser bedeckt ist worden / vnd hat vnzelich vil menschen sampt
den heusern ertrenckt / vnd hinweg gefu:ert.

Hernach zu:o eyner andern zeyt / da der groß Alexander die Juden /
die man die roten Juden nennet / hinder das gebyrge / das
man heyst Caspios montes / verschlossen hat / da ist der fluß / Eufrat
genant / außgeloffen in alle gegent der Araber / vnd hat den
Arabern vnd Persern / grossen trang / ferligkeyt / vnd schaden zu:o
gewendt.

Zu:o der zeyt / da Antiochus Egypten erobert hat / da ist der Nilus /
wider seynen nattu:erlichen lauff / hindersich zu:o seynem
vrsprung gelauffen / auß zwang einer grausamen vnseglichen
vngestu:emigkeyt / hat also schier gantz Alexandrien / vnd
Egyptenland ertrenckt.

Zu:on zeyten Ku:enig Dauids / da ist der Jordan hindersich
geflossen / vnd also getriben worde{n} / das das gantz Hierusalem mit
wasser vberflossen ist.

Zu:o der zeyt des Keysers Julij / als er auß Franckreych wider
heym ist kummen / vnd gen Rom eynzogen / da ist die gantz stat
Rom auß vbergang der Tyber mit wasser gefu:ellt worden.

Die newen Hystorien / welche wir selbs gesehen vnd geho:eret
haben / zeygen auch solche warheyt an / Dann im Dreyssigsten
jare / des achteten tags Octobers / haben die flu:eß des Meers / mit
solcher grosser vngestu:emigkeit die Tyber erfu:ellt / vnd hindersich
getriben / das die gantz stat Rom schier im wasser versuncken ist
vnd vil merckliches schadens den einwonern gethon.

<<A2b>>

Am fu:enfften tag Decembris / hat sich ein solliche grawsame
vngestu:emigkeyt / vnd gewitter erhebt / vber Flandern / Holand /
vnd Seeland / das Antdorff / vnd vil andere Stett mer / gleych
als mitten in eynem See gestanden seynd / hat also das wasser
die Thammen hinweg gerissen / die heuser zerprochen / vnd vil
tausent menschen versencket vnd ertrenckt. Man ist auch
anderer schreckung mer gewertig am himel / welcher / die stern selbs
als die Planeten vnd andere stern / mu:egen wol die fu:ernemeste vrsach
seyn / wie dann der Mon in eynem natu:erlichen tag / zwir in
seynem lauff im auffsteygen das Meer ansich zeucht / vn{d} strewet
das auffgezogen wasser vber das gestat / vnd lassets wider zum
ander mal hernider / vnd wenn also die stern mit der Sonnen jr
wirckung habe{n} / so pflegen sie solche grewliche wunderbarliche
schreckung zu:o generieren / vnd machen / welcher wirckung wirdt
biß auff das viertzigst jar hinein werden.

Jm Zwey vnd Dreyssigsten jar / wenn der Adler vom Nidergang
der Sonnen bewegt wirt / auff die Bambergischen gebirg
wirt er neu:en monat in des Leo hu:ele rhu:oen werden / Da wirt dieweyl
der vergifft Tracke / der mit seynem schnauffen das gantz
erdtrich vergifft / das Osterreychisch volck betru:eben werden /
Seyn gifft wirt er auff zwey hundert meyl wegs außstrewen /
auff all ort gegen Auffgang vnd Nidergang der Sonnen / Das
gantz Teutsch land wirt zu:o krieg bewegt werden / Die Vngern /
Sicilier / Jaziges / Metanaste / werden trawren / Welschland
wirt mit grossem schrecken beladen werden / darzu:o werden die
Bataui / Morini / Engellender / Spanier / Frantzosen disem schedlichen
gifft nicht entfliehen werden. Der Adler nach erfu:ellung
neu:ener monat / wirdt in die gegent des Welschen lands fliegen
werden. Da werden dieweyl die beywoner des Reyns / der Tonaw /
Neckars / Jn / vnd Oetsch / den erloschnen fride beweynen.
Zu:o diser zeit werden alle gewalthaber in jren anschlegen irr geen
vnd mancherley sorg vnd angst leyden werden.

Jm drey vnd Dreyssigsten jar / wirt Welschland zum teil fro:elich
sein / zum teyl aber wirt sie den hal der pusaunen ho:eren / vnd
den klang der waffen in wolcken / tru:ebsal vnd angst / werden alle
<<A3a>>
die stett / so am Meer vmbher ligen / vmbgeben / Fride vnd sige
werden an vil orten Teutsches lands verschwelcken / hunger vn{d}
durst werden im schwanck gehen / Die Wespen vnd raupen werden
alle ort in Sicilia / Apulia / Jnsubria / dazu:o die Hispanische
vnd Frantzo:esische gegent / verderben werden. Das Babylonisch
reych / wirt durch innerliche auffru:or vnd zwitracht betru:ebet werden.
Die sect der Agarener vnd Azerener wirt anfahen zergehen /
vnd zurleschen.

Jm vier vnd dreyssigsten jar / wirdt die Babylonische Hu:er /
die auff dem Tracken mit den siben heuptern sitzet / von jren
liebhabern / verlassen werden / vnd wirt vor traurigkeit
verschmachten.

Der herrlich Adler wirt seyne flu:egel auff den Tracken werffen /
vnd wirt sich in seyn hu:ele eintringen / als dann werden alle
geflu:egel des himels / vn{d} alle kriechende thier / das gantz Tu:erckenland
vmb Constantinopel her / erfu:ellen. O wie grosse freud wirt
als dann allen Christen widerfaren / Sie werden fro:elich seyn /
mit allem triumph der fro:eligkeyt / vnd werde{n} hohe lieder singen
Die vo:elcker von den eussersten o:ertern werden geteylt werden in
die lender Euboiam / Parthiam / Acarnaniam / Boetiam / Epirum /
Etoliam / Vnd wirt fliegen werden vber die herrschafften
der Armenier vnd Persier.

Jm fu:enff vnd dreyssigsten jar / wirt der Adler seine flu:egel
außbreyten werden vber das gantz land der Sueden / Da wirdt ein
Ku:enig / der das zeychen des Creutzes an der stirn getruckt wirdt
haben / an eynem fewrigen strick sich in dise gegent hernider lassen /
da werden alle zier des schmucks vnd aller raub der reychthumb
hinweg genummen. Der Christen bracht vnd geytz wirt
vil lender verderben werden / Der groß herrliche titel der Tarter
damit man die Keyser nennt / wirt außgelescht werden / Tanais
der fluß / wirt all schetz vnd reychtumb zu den Moscabitern / Polen /
vnd Gellern bringen werden / Da wirt angehen werden / ein
gemeine verenderung der gantzen welt / vnd in diser / wirt Hispania
vnd Teutschland mit kro:enung geziert werden.

Jm sechs vnd dreyssigsten jar / werden die bedeutungen / aller
<<A3b>>
gleych herab scheynenden glentzen / die sich im vier vnd zweyntzigsten
jar / des neu:enzehenden tags Februarij begeben haben / jre
bedeutung (sag jch) außstrecken in mancherley lender / welche
mit mancherley vnglu:eck / geferligkeyt / vnd schaden gequelt werden.
Hu:etten sich die Venediger / Jnsubres / vnd Ligures / welche
geplagt werden auffs ho:echst / mit beratschlagung / fu:ernemung /
hilff / vnd ho:echstem vnglu:eck / Gemeyner nutz / vnd regierung
wirt zergehen / vnd durch innerliche auffru:or verwu:estet werden.
Der Adler wirt seynen flug wenden in der Jndianer gegent / vnd
wirdt seyn nest machen werden in den seydenen gegenden. Der
Fenix / Strauß / Camel / Greyff / vnd all Jndianer vo:egel werden
des Adlers junge fu:erchten werden. Der Elephant / Tigris / vnd
Panthier werden gehorsam den Teutschen vnd Hispanischen
Lo:ewen / Hunden / vnd Ba:eren. Die zwey aller mechtigsten Reich
der Ro:emer vnd der Griechen / werden widerumb in jren vorigen
alten vnd aller glücklichsten stand kumen.

Jm siben vnd Dreyssigsten jar / wirdt das gantz Affrica ein
newe gestalt an sich nemen / Denn es wirt mit der Hispanier vnd
Portugaleser waffen zu:o spot werden / vnd wirt widerumb vnter
den zwang des gwalts gebracht werden / Die hocheyt des erdtrichs
wirdt der ebnen vergleycht werden / Vnd die grewlichen
thier Crocodili genant / werden jr narung im Atlantischen meer
suchen werden.

Jm acht vnd Dreyssigsten jar / wirt der Adler seynen flug keren
in Egypten / vnd daselbst wirt er vnzelich vil Jndianer auffrichten /
auff das ein ort verhanden sey / da alle gflu:egel des hymels
jre junge außpru:etten mu:egen / Alle vo:elcker werden zu:o dem
Tempel des Herren ziehen / die sitten werden zu:o Hierusalem
vermischt werden / darzu:o die weiß / gesatz / vnd sprachen aller vo:elcker
Der tempel des Herrn wirt wider auffgebawet werden / Der frid
vnd die sicherheit werden die welt diß jar regieren.

Jm neun vnd dreyssigsten jar / wirdt keyn Sarracen im land
Egypten / vnd in andern vmbligenden lendern genent werden /
Alle ho:ehe werden sich gegen den thelern neygen / Alle secten vnd
geystligkeyt werden mit eynem band zu:osamen gepunden werde{n}.
<<A4a>>
Die Juden so durch die gantzen welt zerstrewet seynd / werden
sich in Armenia / Persia / vnd Egypten versamlen werden / auff
das sie ein trost entpfahen jres Messias / welchen sie als dann
zu:oku:enfftig zu:o seyn verhoffen werden. Aber da werden jnen die
Christen so grossen widerstand thu:on / das groß blu:ot vergiessen
wirt geschehen / vnd wirt auffs grewlichst durch das gantz
erdtrich volstreckt werden.

Jm Viertzigsten jar / da dann aller Planeten eingang wirt in
dem Visch werden / da werden die Oppositiones jre wu:erckung
erfu:ellen / vnd ein gemeyne finsternus der Sonnen / wirdt alle o:erter
vberschatten / So wirt als dann der Adler auff den aller ho:echsten
berg steygen werden / vnd wirt sich in der finsternus verbergen /
das jn keyn vogel anru:eren wirt ku:enden / welchem / so sich
der son der verderbnus vnterstehen wirt nach zu:o folgen / wirt er
von den vo:egeln des hymels zerstrewet werden / Nach welches
verderbung wirt sich der Adler vnd Fenix bey dem gras des
gecreutzigten vereynigen. Nach disen geschichten wirdt die
Monarchei der gantzen welt / gar außreu:eten werden der Nazarener
Secten / welche die letzt vnter allen Secten genent wirt / Dieweil
werden alle verborgne vrteyl Gottes offenbaret werden / so lang
biß alle Propheceyen erfu:ellet werden / Welchs alles jch zum teyl
auß den natu:erlichen vrsachen / zum teil aber auß Go:etlichen
weissagungen genumen hab.

Getruckt zu Nürmberg
durch Künigund
Hergotin.